Лядзішча (Барысаў)

У гэтага паняцця ёсць і іншыя значэнні, гл. Лядзішча (значэнні).

Лядзішча — былы засценак (хутар), потым ваенны гарадок, цяпер мікрараён Барысава Мінскай вобласці.

Гісторыя

Размяшчаўся на вяршыне марэннай грады правабярэжжа Бярэзіны. Назва, напэўна, паходзіць ад паняцця «ляда» — высечанае і расчышчанае пад ворыва месца ў лесе. Тэрыторыя да XIX ст. належала Радзівілам, потым выкуплена скарбам Расійскай імперыі. Вядомы з пачатку XX ст., паводле перапісу 1926 года, засценак (хутар) Лядзішча Бытчанскай воласці Барысаўскага павета.

У канцы 1920-х гадоў каля хутара бальшавікі пачалі будаваць ваенны гарадок для воінскай часці, што кантралявала бальшак з Зембіна ў Барысаў. Гарадок таксама атрымаў назву Лядзішча. Пабудаваны цагляныя чатырохпавярховыя тыпавыя дамы (г.зв. ДАСы) і драўляныя баракі для афіцэраў. Старэйшы з ДАСаў пабудаваны ў 1930 годзе. Ваенны гарадок урэшце паглынуў хутар.

Назву Лядзішча ў 1930-1940-х гады таксама меў артылерыйскі палігон, размешчаны на месцы стрэльбішча імперскага часу, цяпер яго тэрыторую займае 740-я ракетна-зянітная брыгада і 227-ы агульнавайсковы палігон МА РБ. Падчас Вялікай Айчыннай вайны нацысты хавалі на тэрыторыі палігона ахвяр тэрора.

У канцы 1950-х гадоў жыхароў уласна хутара выселелі, а будынкі прыстасавалі пад жытло вайскоўцаў. Пазней частка хутарскіх будынкаў знеслі і на іх месцы пабудавалі стралковы тыр. У 1-й палове 1980-х гадоў на месцы тыра пабудавалі два пяціпавярховыя дамы. Частка драўляных хутарскіх будынкаў выкарыстоўвалі пад санчастку да канца 1980-х гадоў, калі іх знеслі. Да сярэдзіны 1990-х гадоў у Лядзішчы размяшчаліся вайсковыя часці 7-й танкавай арміі МА СССР.

У сярэдзіне 1990-х гадоў ваенны гарадок Лядзішча перададзены гораду і ўключаны ў межы Барысава. Назва Лядзішча захавалася за гэтым раёнам Барысава. У раёне скрыжоўваюцца вуліцы Шпітальная і Дняпроўская. У Лядзішчы знаходзяцца сярэдняя школа № 16, Дом культуры (былы Дом афіцэраў), пошта, некалькі крам, праваслаўная царква. У мясцовай гаворцы сустракаецца варыянт назвы ў множным ліку – Лядзішчы.

Побач колішняга хутара быў бярозавы гай, пэўны час у ім давалі зямлю пад агароды мясцовым жыхарам, летам 2020 года гай высеклі і на яго месца пачалося будаўніцтва мікрараёна Лядзішча-2.

Літаратура

• Мацельскі М. Лядзішча // «Гоман Барысаўшчыны» № 10 (127), 2009.
• Могилин Павел Что такое Лядище, и когда появился в Борисове микрорайон с таким названием // EX-PRESS.BY: Новости Борисова, 19 декабря 2020, 14:30

Спасылкі

• Праект дэтальнага планавання мікрараёна “Лядзішча-2” у г. Барысаве

Няма спасылак на крыніцы. Адсутнасць спасылак на крыніцы выклікае недавер да інфармацыі. Калі ласка, калі ведаеце крыніцы змешчанай у артыкуле інфармацыі, пазначце іх.