Ваксхальм

Ваксхальм (шведск.: Vaxholm) — горад у Швецыі, адміністрацыйны цэнтр камуны Ваксхальм лена Стакгольм, курорт. Размешчаны за 30 км на паўночны ўсход ад Стакгольма на востраве Ваксён у Стакгольмскім архіпелагу. Насельніцтва — 4857 чалавек (2011).

Гісторыя

Заснаваны ў 1558 годзе, калі кароль Густаў Ваза набыў некалькі ферм у графа Пера Брагэ Старэйшага. Пазней Ваксхальм атрымаў правы гандлёвага горада, а ў 1652 годзе гораду былі прадастаўлены гарадскія прывілеі. Гарадскі герб нагадвае ўмацаванні, а таксама суднаходства.

На працягу XIX стагоддзя тэрыторыя горада амаль не пашыралася. У 1880-х гадах ён стаў папулярным курортным гарадком, людзі са Стакгольма пабудавалі шмат драўляных лецішчаў.

Толькі ў 1912 годзе дазволілі будаваць дамы з іншых матэрыялаў, акрамя драўніны, надаючы гораду характэрны выгляд.

Транспарт

Ваксхальм размешчаны на востраве, але з мацерыковай Швецыяй звязаны шэрагам аўтамабільных мастоў, аўтобусам звязаны з горадам Стакгольмам. Waxholmsbolaget і іншыя паромныя лініі забяспечваюць рэйсы да цэнтра Стакгольма і многіх іншых астравоў Стакгольмскага архіпелага.

Аўтамабільная паромная пераправа «Ваксхальмследэн» злучае Ваксхальм з востравам Рындзё праз праліў Кад’юпет. Паром Кастэлет, кабельны паром з электрычным рухам, забяспечвае доступ пасажыраў да замка Ваксхальм на яго астраўку ў цэнтры Кад’юпета.

Славутасці і музеі

• Галоўнай славутасцю Ваксхальма з’яўляецца крэпасць, якая размясцілася ў праліве паміж Ваксёнам і суседнім востравам Рындзё. Яе будаўніцтва пачалося ў сярэдзіне XVI стагоддзя. У цяперашні час у крэпасці размяшчаецца музей, прысвечаны абарончым работам, якія праводзіліся ў мясцовых шхерах з мэтай засцерагчы Стакгольм ад нападу з мора.
• Царква Густава Адольфа, асвечаная 4 верасня 1803 года.
• Ваксхальмскі краязнаўчы музей.
• Замак Багесунд, былая рэзідэнцыя Пера Брагэ Малодшага. У цяперашні час музей.

Знакамітыя ўраджэнцы і жыхары

• Марыя Грыпэ (1923—2007) — шведская пісьменніца, аўтар мноства кніг для дзяцей і юнацтва.

Галерэя

• Ваксхальм і яго ваколіцы (1870)
• Ваксхальмская крэпасць
• Ваксхальмская крэпасць (2013)
• Набярэжная перад гатэлем «Ваксхальм»
• Замак Багесунд
• Ратуша ў Ваксхальме

Зноскі

1. ↑ Statistiska tätorter 2018 – befolkning, landareal, befolkningstäthet — Statistics Sweden, 2019.