Кутна-Гора

Ку́тна-Го́ра (чэшск.: Kutná Hora), был. Кутэнберг (ням.: Kuttenberg) — горад у Сярэднячэшскім краі. З’яўляецца муніцыпалітэтам з пашыранымі паўнамоцтвамі і адміністрацыйным цэнтрам раёна Кутна-Гора. Размешчаны за 60 км на ўсход ад Прагі, на плато Кутна-Гора на вышыні 254 м над узроўнем мора.

Насельніцтва — 21,1 тысяч жыхароў (2005).

Гісторыя

Горад заснаваны ў першай палове XIII стагоддзя. Цэнтр сярэдневяковай срэбраздабыўной індустрыі (у XIII стагоддзі рудні горада давалі траціну агульнаеўрапейскай здабычы срэбра), дзякуючы чаму горад быў другім па багацці ў Чэшскім каралеўстве.

Менавіта рудні і сталі прычынай утварэння першых гарняцкіх пасёлкаў, адзін з якіх атрымаў назву «Cuthna Antiqua», што азначае «старая манаская рыза». Адзін з манахаў, паводле падання, заснуў на суседнім узгорку, а ў сне ўбачыў сярэбраныя зліткі. Прачнуўшыся, ён сапраўды знайшоў іх у паказаным у сне месцы і накрыў гэта месца сваёй рызай. Кутна-Гора стала месцам першай у Еўропе «сярэбранай ліхаманкі». Вакол шахт з’явілася хаатычнае нагрувашчванне халуп, корчмаў, лязняў, крам і да т.п. Затым разрозненыя пасёлкі аб’ядналіся, і Кутна-Гора здабыла прывілеі каралеўскага горада.

Была моцна разбурана ў часы гусіцкіх войнаў. З-за вычарпання руд да сярэдзіны XVI стагоддзя горад прыйшоў у заняпад.

Славутасці

Вядомы шматлікімі помнікамі гатычнай архітэктуры.

• Сабор Святой Варвары 1388—1547 — самы вядомы архітэктурны помнік Кутна-Горы — другі па велічыні і значнасці гатычны храм Чэхіі, пабудаваны ў стылі позняй (уладзіслаўскай) готыкі
• Касцёл Святога Якава Старэйшага (1330)
• Будынак архідыяканства (1594—1599)
• Езуіцкі калегіум (1667—1700)
• Былы манетны двор — Влашскі (Італьянскі) двор (XIII стагоддзе)
• Барочны чумны слуп (1713—1715)
• На ўскраіку горада, у мястэчку Седлец — касцёл Усіх Святых з костніцай пры могілках (каля 1400)
• У Седлецы — сабор Узнясення Дзевы Марыі і Святога Яна Хрысціцеля (1280—1320, 1702—1714)
• Музей срэбра «Градзек» і сярэдневяковая сярэбраная шахта (1485—1505)
• Касцёл Найсвяцейшай Тройцы пры могілках (каля 1415)
• Касцёл Усіх Святых (каля 1290)
• Капэла Божага Цела (каля 1400)
• Кляштар урсулінак (1733—1743)
• Касцёл Маці Божай на Намнеці (1360—1470)
• Касцёл Святога Яна Непамуцкага (1734—1750)
• Каменны фантан (1493—1495)
• Каменны дом (1485—1495)
• Помнік Святому Вацлаву

Гістарычны цэнтр горада ўваходзіць у Спіс аб’ектаў Сусветнай спадчыны ЮНЕСКА.

Эканоміка

Шкловыдзімальны завод, піўная вытворчасць, тытунёвая фабрыка Philip Morris, завод кампаніі «Foxconn».

Транспарт

Чыгуначны транспарт

У межах горада знаходзіцца тры станцыі: Кутна-Гора-галоўная і, на адгалінаванні, Кутна-Гора-Седлец (чэшск.: Kutná Hora-Sedlec) і Кутна-Гора-горад (чэшск.: Kutná Hora město). Апошняя станцыя знаходзіцца бліжэй усяго да гістарычнай часткі горада.

Аўтатранспарт

Некалькі ўнутрыгарадскіх маршрутаў. Міжгароднае паведамленне ажыццяўляецца з аўтобуснай станцыі.

Гарады-пабрацімы

•  Рэймс, Францыя
•  Тарноўске Гуры, Польшча
•  Эгер, Венгрыя

Вядомыя асобы

• Радка Дэнемаркава (нар. 1968) — чэшская пісьменніца.

Гл. таксама

• Костніца ў Седлецы

Зноскі

1. ↑ Jakl L. Jak stará jsou česká města? Legendy a fakta. // iDNES.cz — 2011.

Спасылкі

• На Вікісховішчы ёсць медыяфайлы па тэме Кутна-Гора
• Кутна-Гора — інфармацыйны партал
• Кутна-Гора. Фотагалерэя
• Кутна Гора — славутасцямі і гісторыяй