Ліберац

Лі́берац (чэшск.: Liberec), былы Райхенберг (ням.: Reichenberg) — горад у Чэхіі, на рацэ Ныса-Лужыцка, адміністрацыйны цэнтр Ліберацкага края і Ліберацкага раёна.

Насельніцтва 97,7 тыс. жых. Тэлефонны код: (420)48.

Гісторыя

Горад упершыню згадваецца ў дакументах у 1348 годзе.

У 1579 годзе ў горадзе заснавана тэкстыльная мануфактура, аднак развіццю прамысловасці перашкодзіла Трыццацігадовая вайна. З 1622 года па 1634 год горад быў уладаннем Альбрэхта фон Валенштэйна, пасля смерці якога належаў роду Галас і Клам Галас.

Падчас Сямігадовай вайны ў 1757 годзе недалёка ад горада адбыўся бой пры Рэйхенбергу.

Росквіт горада прыйшоўся на канец XIX стагоддзя. Да гэтага часу адносяцца шматлікія гарадскія пабудовы, у тым ліку ратуша, будынак Оперы, Музей Паўночнай Чэхіі. На ўзгорках вышэй гістарычнага цэнтра горада пабудаваны будынкі ў стылі рамантызму.

У XIX—XX стагоддзях горад меў значную нямецкую абшчыну. Ліберац (Райхенберг) быў цэнтрам нацысцкай Судэцкай Германіі.

Эканоміка

Важны цэнтр тэкстыльнай прамысловасці (ваўняныя, шаўковыя, баваўняныя тканкі). Машынабудаванне (вытворчасць абсталявання для тэкстыльнай прамысловасці, аўтамабілебудаванне — «Ліберацкі аўтамабільны завод»). Праводзяцца тэкстыльныя кірмашы.

Транспарт

Ліберац злучаны з суседнім Ябланцам трамвайный лініяй.

Культура

Нацыянальная навуковая бібліятэка (у новым будынку, пабудаваным у 2000 годзе).

Славутасці

Знакаміты ратушай (1893 год, вышыня — 65 метраў); царквой Святога Распяцця ў стылі барока; тэлевежай на гары Ештэд, пабудаванай у 1968 годзе і якая з’яўляецца цяпер сімвалам горада; карціннай галерэяй. Маецца заапарк — адзін з найбольш вядомых у Еўропе. Найбуйнейшы ў краіне гандлёва-забаўляльны цэнтр «Вавілон».

Спорт

У 2009 годзе ў Ліберацы прайшоў чэмпіянат свету па лыжных відах спорту і міжнародны моладзевы кангрэс эсперанта.

Насельніцтва

Гарады-пабрацімы

•  Аўгсбург, Германія (2001)
•  Дзюнкерк, Францыя
•  Каўроў, Расія[1]
•  Санкт-Гален, Швейцарыя
•  Цытау, Германія

Гл. таксама

• Судэтэнланд

Зноскі

1. ↑ http://www.gorodkovrov.ru/topic/social/goroda-pobratimy-kovrova.html

Спасылкі

• Гарадскі афіцыйны сайт
• Вэб-камера г. Ліберац