Мерыда (Венесуэла)

Мерыда (ісп.: Mérida, поўная назва Santiago de los Caballeros de Mérida) — горад на захадзе Венесуэлы. Сталіца і найбуйнейшы горад штата Мерыда. Насельніцтва каля 300 тыс. жыхароў, з прыгарадамі — больш за 500 тыс. Горад размешчаны ў горнай даліне на вышыні 1630 м паміж хрыбтамі, якія ўваходзяць у горную сістэму Кардыльера-дэ-Мерыда (частка Анд). Месца размяшчэння самай высакагорнай (найвышэйшая кропка 4765 м) і другой па даўжыні ў свеце (12,5 км) канатнай дарогі Teleférico de Mérida, з якой адкрываецца від на пік Балівар.

Гісторыя Мерыда

Першы раз Мерыда была заснаваная нелегальна ў 1558 г. іспанцам Хуанам Радрыгесам Суарэсам, які назваў яе Сант’яга-дэ-Лос-Кабальерас-дэ-Мерыда. З-за адсутнасці дазволу іспанскай кароны на будаўніцтва горада Суарэс быў арыштаваны і адпраўлены ў Багату. Напярэдадні вынясення смяротнага прысуду іспанец знік і схаваўся ў Трухільё (Венесуэла), дзе атрымаў палітычны прытулак. Другі заснавальнік Мерыды, Хуан дэ Мальданада, валодаў неабходным дазволам. Мерыда, якая знаходзіцца ў атачэнні гор, доўгі час была правінцыйным горадам. За некалькі стагоддзяў здарылася ўсяго некалькі знамянальных падзей: моцны землятрус 1820-га года і двухразовы візіт Сымона Балівара па шляху ў Калумбію і пры вяртанні ў Каракас.

Асаблівасці

• Мерыда — універсітэцкі горад, дзе вучыцца каля 40 000 студэнтаў.
• У горадзе налічваецца 28 гарадскіх паркаў. Больш, чым у любым іншым горадзе Венесуэлы .
• Кожны год у Мерыдзе праводзіцца фестываль Ферыя дэль Соль.

Гл. таксама

• Мерыдскі дзяржаўны сімфанічны аркестр
• Андскі ўніверсітэт, Венесуэла

Зноскі

1. ↑ https://news.microsoft.com/es-xl/actualizacion-de-zona-horaria-para-venezuela/

Спасылкі

• Merida.gob.ve(ісп.)