Шарлотэнбург (горад)

У гэтага паняцця ёсць і іншыя значэнні, гл. Шарлотэнбург. Шарло́тэнбург (ням.: Charlottenburg) — горад у Германіі, заснаваны ў 1705 годзе і ўключаны ў 1920 годзе ў склад Вялікага Берліна.

Гісторыя

Назва горада непасрэдна звязаная з імем Сафіі Шарлоты — жонкі курпрынца Брандэнбурга Фрыдрыха I, які стаў у 1701 годзе першым каралём Прусіі. Сафія Шарлота атрымала ў падарунак невялікі загарадны маёнтак, перабудаваны ў прадстаўнічы летні палац Лютцэнбург (ням.: Schloss Lützenburg). Пасля заўчаснай смерці Сафіі Шарлоты палац Лютцэнбург у яе гонар быў пераназваны ў палац Шарлотэнбург[1].

Вакол палаца Шарлотэнбург з пачатку XVIII стагоддзя паступова разрасталіся паселішчы, да 1 студзеня 1877 года пераўтвораныя ў горад Шарлотэнбург, насельніцтва якога да канца XIX стагоддзя налічвала ўжо больш за 100 000 чалавек. У 1878—1884 гады пабудаваная Вышэйшая тэхнічная школа (ням.: Technische Hochschule), цяпер вядомая як Берлінскі тэхнічны ўніверсітэт. Да 1893 года Шарлотэнбург стаў другім па велічыні пасля Берліна горадам у правінцыі Брандэнбург.

З 1900 года ў Шарлотэнбургу пачала працаваць свая электрастанцыя, якая забяспечвала вулічнае асвятленне, патрэбнасці хатніх гаспадарак і прамысловасці[2][3]. У 1905 годзе да 200-гадовага юбілею горада замест старой ратушы, пабудаванай у 1705 годзе, была ўрачыста адкрытая новая ратуша з велічнай 88-мятровай вежай. У 1907—1908 гадах Шарлотэнбург абзавёўся ўласнай брамай, у процівагу Брандэнбургскай у Берліне.

Да 1910 года насельніцтва Шарлотэнбурга павялічылася да 306 000 чалавек. У 1911—1912 гады ў горадзе быў пабудаваны будынак Нямецкай оперы. Першапачаткова гэты тэатр называўся «Нямецкі дом оперы» (ням.: Deutsches Opernhaus).

У 1920 годзе Шарлотэнбург быў уключаны ў склад Вялікага Берліна на правах гарадской акругі[4].

Акруга Шарлотэнбург у выніку адміністрацыйнай рэформы 2001 года ў статусе аднайменнага раёна ўваходзіць ва ўзбуйненую заходнюю сталічную акругу Шарлотэнбург-Вільмерсдорф[5].

Славутасці

• Палац Шарлотэнбург з паркам
• Мемарыяльная царква кайзера Вільгельма
• Ратуша Шарлотэнбурга
• Нямецкая опера

Вядомыя асобы

• Леа фон Капрыві (1831—1899) — нямецкі ваенны і палітычны дзеяч

Галерэя

• Музей керамікі
• На рагу вуліц
• Віла Опенгайм, зараз раённы музей
• Луізенкірхэ
• Сельскагаспадарчы дом
• Будынак, пабудаваны ў 1711 годзе ў горадзе Шарлотэнбург
• Бельведэр у палацавым парку, «Чайны павільён» (з 1900 года)
• Руіны будынка, пабудаванага ў 1901 годзе на тэрыторыі Вышэйшай тэхнічнай школы
• Шарлотэнбургская ратуша, пабудаваная ў 1905 годзе

Зноскі

1. ↑ Максим Нелюбин Шарлоттенбург — дворец бабушки Фридриха Великого. Deutsche Welle. Праверана 3 ліпеня 2019.
2. ↑ Gundlach, Wilhelm: Geschichte der Stadt Charlottenburg. Berlin (Springer) 1905; Erster Band, S. 560 (ням.)
3. ↑ Historische Kommission zu Berlin, Helmut Engel et al. (Hrsg.): Geschichtslandschaft Charlottenburg. Charlottenburg, Teil 1 — Die historische Stadt. Nicolai, Berlin 1986, ISBN 3-87584-167-0, S. 270ff.(ням.)
4. ↑ Gesetz über die Bildung einer neuen Stadtgemeinde Berlin (ням.) . verfassungen.de. Праверана 3 ліпеня 2019.
5. ↑ Berlin_charlottenburg-wilmersdorf.png (PNG-Grafik, 800 × 643 Pixel). upload.wikimedia.org. Праверана 3 ліпеня 2019.

Спасылкі

• На Вікісховішчы ёсць медыяфайлы па тэме Шарлотэнбург (горад)
• Schlosspark Charlottenburg (ням.)
• Charlottenburg Palace (англ.)