Зажэвічы
Зажэ́вічы[1] (трансліт.: Zaževičy, руск.: Зажевичи) — аграгарадок у Салігорскім раёне Мінскай вобласці. Адміністрацыйны цэнтр Зажэвіцкага сельсавета.
Цэнтр калгасу «Перадавік», а пазней сельскагаспадарчага вытворчага кааператыву «Добрыца». Знаходзіцца за 8 км ад Салігорска і за 141 км ад Мінска.
Гісторыя
Вядома з XVI ст. як вёска Зажэвічы (Zażewiczy) або Зажэва (Zażewo) Слуцкага княства. Станам на 1566 год належала да «двара» Пагост. Паводле апісання Слуцкага княства 1600 года належана да «двара» Мяцявічы.
У 1797 годзе Зажэвічы прыватны маёнтак Слуцкага павета Мінскай губерні.
Станам на 1858 года вёска ў складзе фальварка Трасцянец, які знаходзіўся за 5 км паўднёвей, паблізу сучаснай Бярозаўкі.
У 1870 годзе Зажэвічы — сельская грамада Пагосцкай воласці Слуцкага павета Мінскай губерні. Зажоўская грамада адносілася да прыхода Пагосцкай царквы, там хрысціліся і вянчаліся зажоўцы, адпаведна захоўваліся метрычныя кнігі датычныя жыхароў вёскі (царква і яе архіў згарэлі ў 1944 годзе, падчас наступлення савецкай арміі).
У вялікім пажары 1928 года згарэла адзіная і галоўная вуліца Зажэвіч, жыхары рассяліліся па хутарах.
У 1931 годзе ў Зажэвічах арганізаваны калгас «Перадавік», у якім былі два нацыяналізаваныя паветраныя млыны, працавала кузня. З 1938 года савецкія ўлады пачалі гвалтоўнае збіранне зажоўскіх хутароў назад у вёску, прасцейшым спосабам прымусу да перавозу хаты ў вёску было разбурэнне даху.
Дэмаграфія
| Год | Двары | Жыхары |
|---|---|---|
| 1800 | 61 | 225 |
| 1897 | 114 | 1107 |
| 1909 | 171 | 1245 |
| 1917 | 187 | 1346 |
| 1941 | 314 | 1355 |
| 2004 | 340 | 648 |
Адукацыя
У 1861 годзе адкрыта школа граматы, станам на 1890 год там навучаліся 30 хлопчыкаў і 1 дзяўчынка. У 1905 годзе для школы падубавана новае памяшканне. Станам на 1922 год у школе 1-й ступені навучалася 299 дзяцей.
Установы
- Сярэдняя школа-садок
- Крама
- Дом культуры
- Бібліятэка
- Аддзяленне сувязі
Вядомыя асобы
- Сяргей Мікалаевіч Прахорчык (нар. 1954) — беларускі дзяржаўны дзеяч
Зноскі
- ↑ Назвы населеных пунктаў Рэспублікі Беларусь: Мінская вобласць: нарматыўны даведнік / І. А. Гапоненка, І. Л. Капылоў, В. П. Лемцюгова і інш.; пад рэд. В. П. Лемцюговай. — Мн.: Тэхналогія, 2003. — 604 с. ISBN 985-458-054-7. (DJVU)
Літаратура
- Памяць. Салігорскі раён
Спасылкі
На Вікісховішчы ёсць медыяфайлы па тэме Зажэвічы
Катэгорыя·Населеныя пункты Салігорскага раёна Катэгорыя·Населеныя пункты паводле алфавіта
Змесціва гэтай старонкі з праектаў амерыканскага фонда «Вікімедыя» дасяжнае пад сукупнай ліцэнзіяй CC BY-SA 3.0 і GFDL.