Сцяпянка (вёска)

У гэтага тапоніма ёсць і іншыя значэнні, гл. Сцяпянка. У гэтага тапоніма ёсць і іншыя значэнні, гл. Ліпкі.

Сцяпя́нка (раней Ліпкі) — колішняя вёска, з 1987 года ў складзе Мінска. Каля чыгуначнай станцыі Сцяпянка на лініі Орша—Мінск.

Гісторыя

У 1800 годзе вёска Ліпкі, уласнасць князя Дамініка Гераніма Радзівіла, 2 двары, 13 жыхароў. У 1897 годзе ўрочышча Сеніцкай воласці Мінскага павета Мінскай губерні, двор, 5 жыхароў. У 1917 годзе ў фальварку двор, 7 жыхароў, у смалярні 3 двары, 11 жыхароў[1].

У канцы 1940-х гадоў вёска пачала ператварацца ў буйны пасёлак. Побач быў пабудаваны ваенны гарадок і жылы пасёлак геафізічнай экспедыцыі, якія хутка зрасліся з Ліпкамі[2]. Назва Сцяпянка да канца 1970-х гадоў выціснула з ужытку Ліпкі. У 1987 годзе вёска Сцяпянка Зялёналугскага сельсавета Мінскага раёна ўвайшла ў склад горада Мінска[3][2].

У 1988 годзе вясковыя вуліцы атрымалі новыя назвы: Зялёная стала Яблыневай, Кастрычніцкая — Сцяпянскай, Кальцавая — Крынічнай, Усходняя — Палярнай, Паўночны завулак — Сцяпянскім. Пуцейную вуліцу ліквідавалі, пераадрасаваўшы дамы па вуліцы Геалагічнай. Заходняя вуліца стала працягам Геалагічнай, а Чыгуначная — Падлеснай. Захаваліся старыя найменні вуліц Балотнай, Горнай, Дачнай, Сасновай, вуліцы і завулка Геалагічных і Высокіх[2].

Існаванне Сцяпянкі працягваецца ў рамках жылога раёна Сцяпянка ў Партызанскім раёне Мінска. У 2013 годзе ўчастку дарогі ад МКАД да аэрадрома Ліпкі нададзеная назва Вуліца Ліпкаўская, участку дарогі ад вуліцы Ліпкаўскай да аэрадрома нададзена назва завулак Ліпкаўскі[4].

Зноскі

1. ↑ Памяць, 1998, с. 598
2. 1 2 3 Сацукевіч І. І., с. 7
3. ↑ Минск : энциклопедический справочник, 1983, с. 384
4. ↑ Аб прысваенні найменняў састаўным часткам г. Мінска. Решения 26-го созыва № 326/22/26(нявызн.) (недаступная спасылка). Мінскі гарадскі выканаўчы камітэт (3 красавіка 2013). Архівавана з першакрыніцы 26 верасня 2018. Праверана 26 верасня 2018.

Літаратура

• Ліпкі // Памяць: Гіст-дакум. хроніка Мінскага р-на / Гал. рэд. Беларус. Энцыкл.: Г. П. Пашкоў (гал. рэд.) і інш.. — Мінск: БелЭн, 1998. — 640 с.
• Степянка // Минск : энциклопедический справочник / Л. В. Аржаева и др.; редколлегия: И. П. Шамякин (главный редактор) и др.. — Минск: Белорусская Советская Энциклопедия, 1983. — 467 с. — 70 000 экз.
• Рапановіч Я. Н. Слоўнік назваў населеных пунктаў Мінскай вобласці / Рэд. П. П. Шуба. — Мінск: Навука і тэхніка, 1981. — 360 с.
• Сацукевіч І. І. Вёскі, што ўвайшлі ў склад Мінска. — nashapamiac.org.