Сіняўка

У паняцця ёсць і іншыя значэнні, гл. Сіняўка (значэнні). Сіня́ўка[1] (трансліт.: Siniaŭka, руск.: Синявка) — аграгарадок у Клецкім раёне Мінскай вобласці Беларусі. Адміністрацыйны цэнтр Сіняўскага сельсавета.

Геаграфія

Аграгарадок знаходзіцца каля ракі Нача, за 17 км у напрамку на паўднёвы захад ад горада Клецк[2], за 144 км ад Мінска[2], за 17 км ад чыгуначнай станцыі Клецк[2], на скрыжаванні дарог Р13 і Р43.

Гісторыя

Вядома з XV стагоддзя ў Клецкім княстве. З 1552 года мястэчка, ва ўласнасці Боны Сфорца. У 1568—1690 гадах у Клецкай ардынацыі Радзівілаў. З 1793 года цэнтр воласці Слуцкага павета Мінскай губерні. У 1886 годзе ў Сіняўцы дзейнічалі валасная ўправа, 2 царквы, сінагога, малітоўны дом, паштовая станцыя, школа, 7 крам. З 27 ліпеня 1920 года Сіняўка ў Нясвіжскім павеце. З 1921 года цэнтр гміны Навагрудскага ваяводства Польскай Рэспублікі. З 1939 года вёска ў БССР. Цэнтр сельсавета з 1940 года. У час Вялікай Айчыннай вайны захопнікі стварылі ў Сіняўцы гета, у якім загубілі каля 700 жыхароў вёскі[2].

Насельніцтва

• 1886 год — 144 жыхары, 24 двары[2].
• 1905 год — каля 500 жыхароў[2].
• 2001 год — 1728 жыхароў, 714 двароў[2].

Славутасці

• Будынак былой паштовай станцыі (1-я палова 19 ст.)
• Свята-Мікалаеўская царква
• Брацкая магіла (1944).

Вядомыя асобы

• Аляксей Васільевіч Назарэўскі (1881 — ?) — беларуска-рускі грамадска-палітычны дзеяч.
• Лявон Мурашка (1924—2009) — оперны спявак (бас).

Зноскі

1. ↑ Назвы населеных пунктаў Рэспублікі Беларусь: Мінская вобласць: нарматыўны даведнік / І. А. Гапоненка, І. Л. Капылоў, В. П. Лемцюгова і інш.; пад рэд. В. П. Лемцюговай. — Мн.: Тэхналогія, 2003. — 604 с. ISBN 985-458-054-7. (DJVU). Сустракаецца таксама варыянт Сінёўка
2. 1 2 3 4 5 6 7 БелЭн, 2002

Літаратура

• Сіняўка // Беларуская энцыклапедыя: У 18 т. / Рэдкал.: Г. П. Пашкоў і інш.. — Мн.: БелЭн, 2002. — Т. 14: Рэле — Слаявіна. — С. 410. — 512 с. — 10 000 экз. — ISBN 985-11-0238-5 (т. 14), ISBN 985-11-0035-8.
• Ліст карты N-35-113. Выданне 1986 года. Стан мясцовасці на 1982 год. (руск.)

Спасылкі

• На Вікісховішчы ёсць медыяфайлы па тэме Сіняўка
• Глобус Беларусі: Сіняўка
• Радзіма.орг: Сіняўка