Малахоўцы

Малахо́ўцы[1] (трансліт.: Malachoŭcy, руск.: Малаховцы) — вёска ў Баранавіцкім раёне Брэсцкай вобласці. Адміністрацыйны цэнтр Малахавецкага сельсавета. Размешчана за 14 км на поўдзень ад Баранавічаў, за З км ад аўтадарогі Баранавічы — Уцёс, на р. Мышанка. Насельніцтва 151 жыхар, 80 гаспадарак (2005).

Гісторыя

У 1885 годзе ў Ястрамбельскай воласці Навагрудскага павета Мінскай губерні, дзейнічаці млын, царква. Паводле перапісу 1897 года ў вёсцы дзейнічаў вадзяны млын. Асноўным заняткам насельніцтва былі земляробства і жывёлагадоўля. Існавалі таксама промыслы: возніцтва, ткацтва, прадзенне, сплаў лесу і іншыя.

З 1921 года ў складзе Польшчы, у Ястрамбельскай гміне Баранавіцкага павета Навагрудскага ваяводства.

З 1939 года ў БССР. З 15 студзеня 1940 года ў Навамышскім раёне Баранавіцкай, з 8 студзеня 1954 года Брэсцкай абласцей, з 8 красавіка 1957 года ў Баранавіцкім раёне. З 12 кастрычніка 1940 года цэнтр сельсавета.

У Вялікую Айчынную вайну з канца чэрвеня 1941 года да 8 ліпеня 1944 года вёска акупіравана нямецка-фашысцкімі захопнікамі. На франтах вайны загінулі 36 вяскоўцаў.

Інфраструктура

Дзейнічаюць ветэрынарны ўчастак, рамонтна-механічныя майстэрні, сярэдняя школа, клуб, бібліятэка, аддзяленне сувязі, магазін.

Насельніцтва

• XIX стагоддзе:
  • 1885 — 23 двары.
  • 1897 — 66 двароў, 380 жыхароў.
• XX стагоддзе:
  • 1909 — 84 двары, 464 жыхары.
  • 1921 — 61 дом, 306 жыхароў.
  • 1939 — 610 жыхароў.
  • 1959 — 553 жыхары.
  • 1970 — 417 жыхароў.
• XXI стагоддзе:
  • 2005 — 151 жыхар, 80 гаспадарак.

Славутасці

• Свята-Мікалаеўская царква 1920-я гг.

Вядомыя асобы

• І. К. Кабушкін — Герой Савецкага Саюза.
• Алесь Жамойцін — беларускі паэт.

Зноскі

1. ↑ Назвы населеных пунктаў Рэспублікі Беларусь: Брэсцкая вобласць: нарматыўны даведнік / І. А. Гапоненка і інш.; пад рэд. В. П. Лемцюговай. — Мн.: Тэхналогія, 2010.— 318 с. ISBN 978-985-458-198-9. (DJVU)

Літаратура

• Гарады і вёскі Беларусі: Энцыклапедыя. Т. 3, кн. 1. Брэсцкая вобласць / пад навук. рэд. А. І. Лакоткі. — Мн.: БелЭн, 2006. ISBN 985-11-0373-X.

Спасылкі

• На Вікісховішчы пакуль няма медыяфайлаў па тэме, але Вы можаце загрузіць іх