Старое Сяло (Віцебскі раён)

У гэтага паняцця ёсць і іншыя значэнні, гл. Старое Сяло. Старое Сяло — вёска ў Лятчанскім сельсавеце Віцебскага раёна, на аўтадарозе Р20 Віцебск — Полацк; чыгуначная станцыя на лініі Віцебск — Полацк. За 24 кіламетры на захад ад Віцебска.

Гісторыя

У пачатку XVI стагоддзя вядома як баярская ўласнасць у Віцебскім павеце ВКЛ. У 1523 годзе баярыня А. Мастычына і яе сын Ю. Сянкевіч прадалі Старое Сяло віцебскаму ваяводу і каралеўскаму маршалку І. Б. Сапегу. З XVIII стагоддзя маёнтак Лускінаў, у склад якога ўваходзілі таксама вёска Плетніца і Запруддзе. У 1846 годзе ў Старым Сяле дзейнічала крупадзёрка, вадзяны млын, кузня, карчма, штогод адбываліся кірмашы, з 1865 года — народнае вучылішча, з 1886 года — валасное праўленне, паштовая станцыя, школа.

З 20 жніўня 1924 года цэнтр Старасельскага сельсавета Лосвідскага раёна, з 29 кастрычніка 1924 года ў Кузняцоўскім раёне, з 26 сакавіка 1927 года ў Віцебскім раёне.

У часы Вялікай Айчыннай вайны пад нямецкай акупацыяй. З лета 1941 года ў вёсцы дзейнічала група падпольшчыкаў на чале з П. К. Ляхоўскім[1].

З 22 жніўня 1960 года Старое Сяло ў складзе Лятчанскага сельсавета.

Насельніцтва

• 481 жыхар, 125 двароў (1941)
• 611 жыхароў, 245 двароў (1969)
• 534 жыхары, 224 двары (2001)

Інфраструктура

• Сярэдняя школа
• Клуб
• Аддзяленне сувязі

Славутасці

• Помнік землякам, якія загінулі ў гады Вялікай Айчыннай вайны
• Каля вёскі аднайменны археалагічны помнік — гарадзішча днепра-дзвінскай культуры, селішча і 3 курганныя могільнікі.

Вядомыя асобы

• Генадзь Якаўлевіч Бяляеў (нар. 1939) — беларускі спецыяліст у галіне тэхналогіі машынабудавання. Кандыдат тэхнічных навук (1975), дацэнт (1978), прафесар (1998).

Зноскі

1. ↑ Дарафеенка, Н. І. Віцебскае патрыятычнае падполле / Н. І. Дарафеенка // Энцыклапедыя гісторыі Беларусі. У 6 т. Т. 2: Беліцк — Гімн / Рэдкал.: Б. І. Сачанка (гал. рэд.) і інш.; Маст. Э. Э. Жакевіч. — Мн.: БелЭн, 1994. — 537 с., [8] к.: іл. — 20 000 экз. — ISBN 5-85700-142-0. — С. 319—320.

Літаратура

• Беларуская энцыклапедыя: У 18 т. / Рэдкал.: Г. П. Пашкоў і інш.. — Мн.: БелЭн, 2002. — Т. 15: Следавікі — Трыо. — 552 с. — 10 000 экз. — ISBN 985-11-0251-2 (т. 15), ISBN 985-11-0035-8.