Параф’янава (Сітцаўскі сельсавет)

У паняцця ёсць і іншыя значэнні, гл. Параф’янава. Параф’я́нава[1] (трансліт.: Parafjanava, руск.: Парафьяново) — вёска ў Докшыцкім раёне Віцебскай вобласці. Уваходзіць у склад Сітцаўскага сельсавета.

Назва

Ёсць некалькі версій паходжання назвы Параф’янава. Адна з іх — ад імя Параф’ян або прозвішча Параф’янаў.

Ад маёнтка Параф’янава атрымала назву чыгуначная станцыя Параф’янава на лініі Полацк — Маладзечна, пабудаваная ў 1902—1906 гадах.

Гісторыя

Упершню Парафенава згадваецца ў крыніцах пад 1435 годам, калі землі на ўсходзе Куранецкай воласці былі вылучаны для забеспячэння пасады Віленскага архідыякана. Тады паміж маёнткамі Даўгінава, Докшыцы і Парфенава засталіся неразмежаванымі лугі па рэках Бладзь (Блядка), Лыха і Зуя (Зуйка), з-за якіх у XV—XVI стагоддзях часта ўзнікалі спрэчкі.

Пасля другога падзелу Рэчы Паспалітай (1793) Парафенава ў Расійскай імперыі, у складзе Вілейскага павета спачатку Мінскай, потым Віленскай губерні. 18 жніўня 1795 года маёнтак Парфенава Віленскай архідыяцэзіі быў канфіскаваны, як і большасць маёнткаў каталіцкай царквы. У XIX ст. у розныя часы маёнтак належаў Пшаздзецкім, Тышкевічам. У той час Парфенава стала цэнтрам воласці. Па звестках «Слоўніка геаграфічнага Каралеўства Польскага і іншых краёў славянскіх», у 1886 годзе ў Парфенаве жыло 45 чалавек. Каля 1880 года ўзведзены бровар.

У 1921—1945 гадах маёнтак у складзе гміны Параф’янава Дзісенскага павета Віленскага ваяводства.

Пасля 2-й сусветнай вайны значна вырасла аднайменнае паселішча Параф’янава каля чыгуначнай станцыі Параф’янава, яно стала цэнтрам асобнага Параф’янаўскага сельсавета і пазней атрымала статус аграгарадка. У вёсцы ж Параф’янава (былым маёнтку) пасля вайны жыло толькі 250 чалавек, яна не адміністрацыйны цэнтр, уваходзіць у склад Сітцаўскага сельсавета.

Славутасці

• Касцёл Найсвяцейшай Дзевы Марыі (1908—1913, раней — касцёл Іаана Хрысціцеля[2])
• Параф’янаўская сядзіба (страчана)

Насельніцтва

• 1886 год — 45 жыхароў
• 1921 год — 232 жыхары, 23 двары[3].
• 1931 год — 195 жыхароў, 18 двароў[4].

Вядомыя асобы

• Лявон Гмырак (Мечыслаў Бабровіч; 1891—1915) — беларускі крытык, публіцыст і празаік.
• Уладзімір Аляксандравіч Дукельскі (1903—1969) — кампазітар, піяніст, паэт і перакладчык.
• Ян Станіслававіч Бабровіч (1902—1943) — дзеяч рэвалюцыйнага руху ў Заходняй Беларусі, публіцыст.

Пахаваныя

• Юрый Гіль (1942—2009) — беларускі грамадскі дзеяч.

Галерэя

Зноскі

1. ↑ Назвы населеных пунктаў Рэспублікі Беларусь: Віцебская вобласць: нарматыўны даведнік / У. М. Генкін, І. Л. Капылоў, В. П. Лемцюгова; пад рэд. В. П. Лемцюговай. — Мн.: Тэхналогія, 2009. — 668 с. ISBN 978-985-458-192-7 (DJVU).
2. ↑ Беларуская энцыклапедыя: У 18 т. / Рэдкал.: Г. П. Пашкоў і інш.. — Мн.: БелЭн, 2001. — Т. 12: Палікрат — Праметэй. — 576 с. — 10 000 экз. — ISBN 985-11-0198-2 (т. 12), ISBN 985-11-0035-8.
3. ↑ Skorowidz miejscowości Rzeczypospolitej Polskiej — Tom VII — Część II — Ziemia Wileńska — Powiaty: Brasław, Duniłowicze, Brasław i Wilejka, Główny Urząd Statystyczny Rzeczypospolitej Polskiej, Warszawa 1923, s 32.
4. ↑ Wykaz miejscowości Rzeczypospolitej Polskiej, Warszawa 1938, wolumin — 1, s. 22

Спасылкі

• На Вікісховішчы пакуль няма медыяфайлаў па тэме, але Вы можаце загрузіць іх
• Parafianów, folwark, powiat wilejski, gmina Parafianów // Słownik geograficzny Królestwa Polskiego i innych krajów słowiańskich. — Tom VII (Netrebka — Perepiat), 1886. — S. 858 (польск.)