Мацавічы (Мінскі раён)

У паняцця ёсць і іншыя значэнні, гл. Мацавічы.

Ма́цавічы[2] (трансліт.: Macavičy, руск.: Мацевичи) — вёска ў Мінскім раёне Мінскай вобласці. Уваходзіць у склад Навадворскага сельсавета. Месціцца за 8 км на паўднёвы ўсход ад Мінска, на рацэ Свіслач.

Гісторыя

У 1582 годзе сяло ў Менскім павеце Менскага ваяводства Вялікага Княства Літоўскага маёнтка Каралішчавічы, уласнасць Г. М. Масальскай. У 1598 годзе ўласнасць Д. Тышкевіча, у 1599—1600 гадах уласнасць Д. Скуміна-Тышкевіча. У 1772 годзе ўласнасць І. Прушынскага.

У выніку другога падзелу Рэчы Паспалітай 1793 года тэрыторыя апынулася ў складзе Расійскай імперыі. У 1800 годзе ў Мінскім павеце Мінскай губерні, уласнасць Каралішчавіцкай каталіцкай плябаніі і Марцінеўскага. У 1884 годзе адкрытая школа граматы, якая ў 1912 годзе была пераўтвораная ў народнае вучылішча. У 1897 годзе вёска і карчма ў Пярэжырскай воласці Ігуменскага павета.

З канца лютага 1918 года тэрыторыя акупаваная войскамі Германскай імперыі. 25 сакавіка 1918 года згодна з Трэцяй Устаўной граматай абвяшчалася часткай Беларускай Народнай Рэспублікі. У снежні 1918 года занята Чырвонай Арміяй, з 1 студзеня 1919 года ў адпаведнасці з пастановай І з’езда КП(б) Беларусі яна ўвайшла ў склад Савецкай Беларусі, з 27 лютага 1919 года — у ЛітБел ССР. У час польска-савецкай вайны ў жніўні 1919 — ліпені 1920 гадоў і ў сярэдзіне кастрычніка 1920 года пад акупацыяй Польшчы.

З 31 ліпеня 1920 года ў Беларускай ССР. З 20 жніўня 1924 года ў Каралішчавіцкім сельсавеце Самахвалавіцкага раёна Менскай акругі (да 26 ліпеня 1930 года). З 18 студзеня 1931 года ў падпарадкаванні гарадскога савета Менска. З 26 траўня 1935 года ў Менскім раёне, з 20 лютага 1938 года ў Менскай вобласці.

У Другую сусветную вайну з канца чэрвеня 1941 года да пачатку ліпеня 1944 года вёска пад акупацыяй Германіі.

Да 5 сакавіка 1959 года вёска ўваходзіла ў склад Каралішчавіцкага сельсавета[3], да 20 студзеня 1960 года — у склад Трасцянецкага сельсавета[4].

Насельніцтва

• 1772 год — 7 двароў, 34 жыхары
• 1800 год — 8 двароў, 115 жыхароў
• 1897 год — 21 двор, 133 жыхары
• 1917 год — 27 двароў, 139 жыхароў; маёнтак, 1 двор, 10 жыхароў; фальварак, 1 двор, 12 жыхароў
• 1926 год — 36 двароў, 156 жыхароў
• 1997 год — 63 гаспадаркі, 129 жыхароў
• 1999 год — 76 жыхароў
• 2010 год — 79 жыхароў

Зноскі

1. ↑ Перапіс насельніцтва Беларусі 2009 года
2. ↑ Назвы населеных пунктаў Рэспублікі Беларусь: Мінская вобласць: нарматыўны даведнік / І. А. Гапоненка, І. Л. Капылоў, В. П. Лемцюгова і інш.; пад рэд. В. П. Лемцюговай. — Мн.: Тэхналогія, 2003. — 604 с. ISBN 985-458-054-7. (DJVU)
3. ↑ Рашэнне выканкома Мінскага абласнога Савета дэпутатаў працоўных ад 5 сакавіка 1959 г. // Збор законаў, указаў Прэзідыума Вярхоўнага Савета Беларускай ССР, пастаноў і распараджэнняў Савета Міністраў Беларускай ССР. — 1959, № 4.
4. ↑ Рашэнне выканкома Мінскага абласнога Савета дэпутатаў працоўных ад 20 студзеня 1960 г. // Збор законаў, указаў Прэзідыума Вярхоўнага Савета Беларускай ССР, пастаноў і распараджэнняў Савета Міністраў Беларускай ССР. — 1960, № 2.

Літаратура

• Мацавічы // Гарады і вёскі Беларусі: Энцыклапедыя. Т. 8, кн. 3. Мінская вобласць / Рэдкалегія: Т. У. Бялова (дырэктар) і інш. — Мн.: БелЭн, 2012. — 624 с.: іл. ISBN 978-985-11-0636-9. С. 428

Спасылкі

• На Вікісховішчы ёсць медыяфайлы па тэме Мацавічы (Мінскі раён)